Rusiya səhvini etiraf etdi? - “Azərbaycanla əlaqələrimizi korlayan əsas səbəb...”

Rusiyalı politoloq Sergey Markov 2024-cü il dekabrın 25-də Aktau yaxınlığında qəzaya uğrayan “Azərbaycan Hava Yolları”na məxsus sərnişin təyyarəsinin Rusiya tərəfindən vurulduğunu etiraf edib.

İyulun 24-də “Tsarqrad” telekanalının efirində danışan S.Markovun sözlərinə görə, Moskva ilə Bakı arasında münasibətlərin korlanmasına səbəb məhz təyyarənin vurulması olub:

“Rusiya ilə Azərbaycan arasında baş verənlərin səbəbi, şübhəsiz ki, təyyarədir. Məlum olduğu kimi, biz ruslar təyyarəni vurmuşuq və bu, tamamilə aydındır”.

Politoloq qeyd edib ki, təyyarəni Rusiyanın vurduğunu Moskvada da, Bakıda da hamı bilir.

S.Markov xatırladıb ki, İkinci Qarabağ müharibəsi zamanı təsadüfən Rusiya hərbi helikopterini vurduğu zaman Azərbaycan rəsmən üzr istəyib, günahkarları müəyyənləşdirərək cəzalandırıb, təzminat ödəyib:

“Azərbaycan Moskvadan eyni cavabı gözləyir. Rusiya Federasiyası isə öz günahını etiraf etmir və təyyarənin vurulmasını Hava Hücumundan Müdafiə sisteminin Ukrayna dronlarının hücumunu dəf etməsi ilə əsaslandırır”.