Rusiya XİN-dən Brüssel görüşü ilə bağlı sərt açıqlama
Brüsseldəki görüş Cənubi Qafqazı geosiyasi qarşıdurmaya çəkmək üçün növbəti cəhddir. Bu barədə Rusiya Xarici İşlər Nazirliyinin bəyanatında deyilir.
“Biz 2024-cü il aprelin 5-də Brüsseldə keçirilən Ermənistan-ABŞ-Aİ formatında yüksəksəviyyəli görüşü “kollektiv Qərb”in Cənubi Qafqazı geosiyasi qarşıdurmaya çəkmək üçün növbəti cəhdi kimi qiymətləndiririk. Regiondankənar qüvvələrin Cənubi Qafqazın işlərinə məsuliyyətsiz müdaxiləsi regionda sabitlik, təhlükəsizlik və iqtisadi inkişaf üçün ən mənfi nəticələrə gətirib çıxara bilər, yeni bölücü xətlərin yaranmasına, eləcə də gərginliyin artmasına səbəb olar”, – bəyanatda deyilib.
Sənəddə həmçinin vurğulanıb ki, Qərb Ermənistanı Cənubi Qafqazda son dərəcə təhlükəli planlarının həyata keçirilməsi üçün alətə çevirmək istəyir:
“Biz bilirik ki, Vaşinqton və Brüssel Ermənistanın Kollektiv Təhlükəsizlik Müqaviləsi Təşkilatı və Avrasiya İqtisadi İttifaqından, Rusiya hərbi bazası və sərhədçilərinin isə bu ölkədən çıxarılmasına çalışır. Biz İrəvan rəhbərliyini Qərbin ölkəni təhlükəsizlik vakuumuna sürükləməsinə və iqtisadiyyatda ciddi problemlərə yol açacaq yanlış istiqamətə yönəltməsinə imkan verməməyə çağırırıq”.
Rusiya XİN-dən həmçinin bildirilib ki, Qərb Ermənistan-Azərbaycan normallaşmasının fundamental əsasını – Rusiya, Ermənistan və Azərbaycan liderlərinin 2020-2022-ci illərdə nəqliyyat və iqtisadi blokadanın aradan qaldırılması üçün tədbirləri nəzərdə tutan üçtərəfli bəyanatlar toplusunu məhv etmək cəhdlərindən də əl çəkmir.
“Məhz Vaşinqton və Brüsselin təzyiqi ilə rəsmi İrəvan bu sazişlərin icrasını dayandırdı. Razılaşmaların bir çoxu üzrə, xüsusən də qarşılıqlı nəqliyyat blokadasının aradan qaldırılması məsələsində tərəflər qarşılıqlı məqbul həll yollarına yaxın idi. Moskva bu gün də Azərbaycan və Ermənistan arasında çoxdan gözlənilən sülhə nail olmaq üçün hər cür kömək etməyə hazırdır. Biz İrəvan hakimiyyətini öz xarici siyasət xəttini qurarkən qonşu dövlətlərin narahatlığını nəzərə almağa çağırırıq”, – Rusiya XİN-dən bildirilib.