Caliber.az Brüssel görüşü ilə bağlı məqalə yaydı

“Ermənistanın Baş naziri Nikol Paşinyanın ABŞ dövlət katibi Entoni Blinken və Avropa Komissiyasının prezidenti Ursula fon der Leyenlə görüşündən iki gün əvvəl – aprelin 3-də sensasiyalı hərbi-siyasi gündəmi ilə bağlı məlumat verdiyimiz “Brüssel toplantı”sı ilk baxışdan kifayət qədər “sadə” nəticə ilə başa çatdı: Ermənistana bir neçə yüz milyon dollarlıq iqtisadi yardım edildi, vəssəlam.

Həmin vaxt bir çox insanda məntiqi sual yaranmışdı: doğrudanmı, gərgin iş qrafiki heç kəsdə şübhə doğurmayan E.Blinken belə bir xırdalıq üçün Vaşinqtondan Brüsselə uçmuşdu? Elə həmin vaxt ekspertlər bildirdilər ki, biz ancaq Ermənistan və onun Qərbdəki müttəfiqlərinin yayımladığı mənzərəni görürük”.

Bu barədə “Caliber”in hazırladığı məqalədə bildirilir.

Qeyd olunur ki, görüşdən dərhal sonra nəşr Brüsseldəki pərdə arxası danışıqların və orada əldə olunan razılaşmaların təfərrüatını mütləq təqdim edəcəyini bildirib.

“Budur, artıq etibarlı mənbələrdən ABŞ və Avropa İttifaqından Ermənistana hərbi-siyasi dəstəyin hansı istiqamətlərdə və hansı konkret proqramlar əsasında veriləcəyi barədə məlumat aldıq. Hazırda daxil olan sənədləri təhlil edirik və tezliklə məlumatları geniş ictimaiyyətlə paylaşacağıq.

Amma artıq indidən deyə bilərik ki, Qərbin Ermənistana dəstəyinin dərəcəsi bütün gözləntilərimizi üstələyib. Əminik ki, Gürcüstan və Moldova da çox təəccüblənəcək, axı gürcülərin və moldovalıların ancaq xəyal edə biləcəyini artıq ermənilər əldə edirlər. Təəssüf ki, hər şey bu dəstəyin ilk növbədə Azərbaycana qarşı yönəldiyini göstərir”, – deyə məqalədə vurğulanıb.