Rusiyalı deputat seçkidən danışdı | Azərbaycan 3 şərti yerinə yetirdi

“Azərbaycanda növbədənkənar prezident seçkiləri dünyada ikili standartların tüğyan etdiyi bir şəraitdə baş tutdu. Təbii ki, bir sıra Qərb təşkilatları seçkinin nəticələri ilə bağlı hansısa nöqsan axtarmağa çalışacaqlar. Ancaq insanlar ötən gün seçkilərdə öz iradələrini sərbəst şəkildə ifadə etdilər”.

Bunu Rusiya Dövlət Dumasının deputatı Aleksandr Yuşenko Azərbaycanda keçirilən növbədənkənar prezident seçkilərinin monitorinqinin nəticələrinə dair mətbuat konfransında deyib.

“Səsvermə nizam-intizam şəraitində keçib, vətəndaşlar səsvermədə fəal iştirak ediblər. Bununla da insanlar Prezident İlham Əliyevin apardığı zəfər kursunu dəstəklədiklərini nümayiş etdiriblər”, – siyasətçi bildirib.

O vurğulayıb ki, Azərbaycan öz müstəqil siyasi kursuna sadiq qalan ölkələrdən biridir: “Belə ölkələr üç əsas şərti yerinə yetirdikdə qlobal qarşıdurmada qalib gəlirlər. Birincisi, bütün resursların səfərbər edilməsidir. İkincisi, əhali arasında birlik və həmrəyliyi, üçüncüsü, müasir elmi-texniki nailiyyətlərə əsaslanan güclü iqtisadiyyatı təmin etməkdir. Biz Azərbaycanda keçirilən seçkilər zamanı hər üç nailiyyətin şahidi olduq”.