Rusiyalı ekspert Putinin Azərbaycana səfərindən danışdı | Fransa kimi parazit ölkələrin…

Rusiya Prezidenti Vladimir Putinin avqustun 18-19-da Azərbaycana səfəri dövlətlər arasında münasibətlərin yüksək səviyyədə olduğunun bir daha təsdiqidir.

Səfər zamanı Rusiya və Azərbaycan altı sənəd – üç saziş və üç memorandum imzalayıb. Tərəflər həmçinin birgə bəyanat qəbul ediblər. Prezident İlham Əliyev bu səfərin xüsusi xarakter daşıdığını vurğulayıb.

Mövzu ilə bağlı Baku TV-yə açıqlama verən rusiyalı hərbi ekspert İqor Korotçenko Vladimir Putinin Azərbaycana səfərinin çox məhsuldar olduğunu bildirib:

“Rusiya və Azərbaycan qarşılıqlı ticari-iqtisadi, eləcə də perspektivli enerji layihələri üzrə bir sıra sazişlər imzalayıb. Rusiya liderinin səfərinin nəticələrinin müstəsna dərəcədə yüksək olduğunu deyə bilərik. İki ölkənin münasibətləri yeni səviyyəyə yüksəlib.

Rusiya Azərbaycanı özünün etibarlı strateji tərəfdaşı, müttəfiqi, heç bir problemi olmayan ölkə kimi görür. Siyasi, iqtisadi, hərbi-texniki sahələrdə əlaqələr uğurla inkişaf edir. Bu münasibətlər başqa dövlətlər üçün nümunə olmalıdır”.

Hərbi ekspert qeyd edib ki, Azərbaycan bu gün Cənubi Qafqazda aparıcı roldadır və təkcə öz ərazisindəki deyil, həm də Cənubi Qafqaz regionundakı ümumi vəziyyətə görə məsuliyyət daşıyır:

“Azərbaycan hazırda beynəlxalq münasibətlərin əsas iştirakçısı, qlobal miqyasda təşəbbüslər həyata keçirən nüfuzlu, hörmətli ölkədir. Rəsmi Bakının həyata keçirdiyi digər mühüm iş isə Fransa kimi parazit ölkələrin öz müstəmləkələrini istismar etmək prinsipindən məhrum etmək siyasətidir.

Müstəmləkəçilik əleyhinə mübarizə aparır. Ümumiyyətlə, bizim ümumi vəzifəmiz Rusiya Prezidenti Vladimir Putinin Azərbaycana bu tarixi dövlət səfəri zamanı əldə edilmiş qərarları və razılaşmaları səmərəli şəkildə həyata keçirməkdir”.