Rusiyanın səyləri boşa çıxdı | Rusiyalı səfirdən Qarabağ açıqlaması

Qarabağ məsələsi bağlanıb. Bu məsələ sentyabrda həll olunub.

Rusiyanın Azərbaycandakı səfiri Mixail Yevdokimov "İzvestiya" qəzetinə müsahibəsində bildirib ki, keçən illər ərzində Rusiya Qarabağ problemini sülh yolu ilə həll etmək üçün səy göstərsə də, təəssüf ki, alınmayıb.

Rəsmi Moskvanın bu məsələdə çox mühüm rol oynadığını deyən diplomat ölkəsinin sülh müqaviləsi üzrə danışıqlarda tərəflərə maksimum dəstək verməyə hazır olduğunu bildirib.

Rusiya sülhməramlılarının fəaliyyətindən də danışan səfirin sözlərinə görə, bununla bağlı Moskva və Bakı arasında danışıqların növbəti raundunun tarixləri hazırda Azərbaycan Xarici İşlər Nazirliyi ilə razılaşdırılır. Səfir bu mövzunun çox önəmli olduğunu bildirib.

Mixail Yevdokimovun sözlərinə görə, antiterror tədbirləri başa çatdıqdan sonra Rusiya sülhməramlıları Azərbaycan qüvvələri ilə birlikdə ərazidə patrul xidməti həyata keçirir, binaları və mədəni obyektləri qoruyur.

Naxçıvana nəqliyyat dəhlizinin açılması məsələsinə də toxunan Rusiyanın ölkəmizdəki səfiri Ermənistanın danışıqları gecikdirdiyini deyib. Diplomat bu mövzunun Azərbaycan tərəfi üçün çox önəmli olduğunu bildirib.

Sonda səfir Bakı ilə İrəvan arasında sülh müqaviləsi layihələrinin mübadiləsinin həyata keçirildiyini xatırladaraq Azərbaycanın təklifinin tamamilə əsaslandırılmış olduğunu vurğulayıb.