Sərhədlərin delimitasiyası ilə bağlı əsasnamə təsdiqləndi | Erməni mediasından məlumat

Ermənistan parlamenti Azərbaycanla sərhədlərin delimitasiyası üzrə komissiyaların birgə fəaliyyəti haqqında reqlamenti ratifikasiya edib.

Bu barədə ölkə mətbuatında məlumat verilib.

Bildirilib ki, sənədin lehinə 67 deputat səs verib. Bitərəf və əleyhinə səs verən olmayıb. Müxalifətin “Hayastan” və “Şərəfim var” fraksiyaları müzakirə və səsvermədə iştirak etməyib.

Qeyd edək ki, Azərbaycan və Ermənistan sözügedən əsasnaməni avqustun 30-da imzalayıb. Reqlament delimitasiya işlərinin təşkilini və müvafiq sənədlərin qəbulunu, dövlət sərhədinin kəsişməsinin protokol-təsvirinin və müvafiq miqyaslı delimitasiya xəritəsinin tərtibini, eləcə də ekspert qruplarının işini nəzərdə tutur.

Bundan əlavə, sentyabrın 26-da Ermənistanın Konstitusiya Məhkəməsi Azərbaycanla sərhədlərin delimitasiyası üzrə işçi komissiyanın reqlamentinin qanunauyğun olduğuna dair qərar qəbul edib.