Səsvermə prosesi necə həyata keçirilir? - Baku TV əməkdaşı seçki məntəqəsində

Yanvarın 29-da səhər saat 08:00-da Azərbaycanda bələdiyyə seçkiləri ilə əlaqədar səsvermə başlayıb.

Seçkilərdə 16 092 namizəd mübarizə aparır. Seçkilər zamanı respublika üzrə 685 bələdiyyəyə 8 071 üzv seçiləcək.

Səsvermə 118 seçki dairəsi üzrə 5846 seçki məntəqəsində keçirilir.

Baku TV-nin əməkdaşı Arzu Həsənzadə 18 saylı Nərimanov-Nizami-Binəqədi Seçki Dairəsinin 2 saylı seçki məntəqəsində olaraq səsvermə prosesinin necə həyata keçirildiyini mərhələlərlə diqqətə çatdırıb.

Belə ki, seçici seçki məntəqəsinə daxil olduqdan sonra şəxsiyyət vəsiqəsini məntəqə üzvünə təqdim etməlidir.

Sənəd yoxlanıldıqdan sonra sol əlin baş barmağının ultrabənövşəyi şüa vasitəsilə müəkkəblə işarələnib-işarələnmədiyi müəyyənləşdirilir.

Yoxlama prosesi yekunlaşdıqdan sonra seçici şəxsiyyəti təsdiq edən sənədi təhvil alaraq digər komissiya üzvlərinə yaxınlaşmalıdır. Adı siyahıda tapıldıqdan və imzasını çəkdikdən sonra seçiciyə seçki bülleteni təqdim olunur.

Daha sonra seçicinin sol əlinin baş barmağı gözəgörünməz mürəkkəblə işarələnir. Bununla da, seçici səsvermə hüququndan istifadə edə bilər.