Simonyan və Sahibə Qafarova arasında keçiriləcək görüşünün tarixi açıqlandı
Azərbaycan və Ermənistan parlamentlərinin rəhbərləri Sahibə Qafarova və Alen Simonyan mayın ortalarında növbəti görüşlərini keçirəcəklər.
Bu barədə Alen Simonyan Ermənistanın İctimai Televiziyasının efirində deyib.
"Biz növbəti görüşlə bağlı razılığa gəldik. İlkin razılıq var ki, növbəti görüş mayın ortalarında baş tutacaq", – deyə o bildirib.
A.Simonyanın sözlərinə görə, görüş Parlamentlərarası İttifaq çərçivəsində baş tuta bilər. "Parlamentlərarası İttifaq platforması həm bizim, həm də Azərbaycan tərəfi üçün arzuolunandır, onlar müdaxilə etmirlər və sadəcə məkan verirlər", – deyə A.Simonyan əlavə edib.
Qeyd edək ki, Sahibə Qafarova və Alen Simonyan martın 22-də Cenevrədə Parlamentlərarası İttifaqın 148-ci Assambleyası çərçivəsində görüşüblər. Görüşdə Azərbaycan və Ermənistan arasında sülh danışıqları prosesinə iki ölkə parlamentlərinin mümkün yardımı məsələləri müzakirə olunub. Tərəflər həmçinin parlamentlərarası səviyyədə dialoqun mümkünlüyünü nəzərdən keçirmək barədə razılığa gəliblər.