Somali Prezidenti Azərbaycanda | Liderlərin təkbətək görüşü keçirildi

Fevralın 12-də Azərbaycanda rəsmi səfərdə olan Somali Prezidenti Hasan Şeyx Mahmudun rəsmi qarşılanma mərasimi olub.

Hər iki ölkənin dövlət bayraqlarının dalğalandığı meydanda Somali Prezidentinin şərəfinə fəxri qarovul dəstəsi düzülüb.

Prezident İlham Əliyev Somalidən olan həmkarı Hasan Şeyx Mahmudu qarşılayıb. Fəxri qarovul dəstəsinin rəisi Somali Prezidentinə raport verib.

Hər iki ölkənin dövlət himnləri səsləndirilib. Fəxri qarovul dəstəsi hərbi marşın sədaları altında Prezident İlham Əliyevin və Somali Prezidenti Hasan Şeyx Mahmudun qarşısından keçib. Dövlət başçıları rəsmi foto çəkdiriblər.

Daha sonra iki lider arasında təkbətək görüş olub. Eyni zamanda Prezidentlər – İlham Əliyev və Hasan Şeyx Mahmudun iştirakı ilə Azərbaycan və Somali arasında imzalanmış sənədlərin mübadiləsi mərasimi olub.