Son vaxtlar telefonlara da cavab vermirdi | Qüdrət Həsənquliyev niyə gileyləndi?

“Müzakirəyə çıxarılmış məsələ ilə bağlı diqqətimi çəkən bir məqam ondan ibarət oldu ki, Ali Məhkəməyə üzv təyin olunan İlqar Cəfərov xüsusi qaydada təyin olunur. Yəni hakimlərin seçilməsinin ümumi qaydasından kənar formada.

İlqar Cəfərovun son iş yeri Ədliyyə Nazirliyinin icra baş idarəsi olub. Mən onu tələbəlik illərindən savadlı bir hüquqşünas kimi tanıyıram. Amma çox təəssüf ki, onun bu idarənin rəisi olduğu dövrdə məhkəmə qərarlarının icrası ilə bağlı vəziyyət yaxşıya doğru əhəmiyyətli miqyasda dəyişmədi”.

Bu fikirləri deputat Qüdrət Həsənquliyev Milli Məclisin oktyabrın 8-də keçirilən plenar iclasında çıxışı zamanı səsləndirib.

Millət vəkili Ədliyyə Nazirliyinin məhkəmə və digər orqanların qərarlarının icrası ilə bağlı yerləşdirdiyi statistik məlumatlara baxdığını bildirib:

“2023-cü ildə 1 120 561 iş icraya daxil olub. İcrası təmin edilən və icrası davam etdirilən sənədlərin sayı isə 564 763 olub. Yəni bu, 50 faizdən azdır. Burada da bəlli olmur ki, bunların nə qədəri icra edilib. Ona görə ki, icrası təmin edilənlə və icrası davam etdirilənlər eyni qrafada verilib.

İlqar Cəfərov, görünür bilirmiş ki, Ali Məhkəməyə üzv təyin olunacaq, ona görə son vaxtlar telefonlara da cavab vermirdi. Amma mən ona göstərilmiş etimadı dəstəkləyəcəyəm və ona səs verəcəyəm. Ümid edirəm ki, o, Ali Məhkəmənin hakimi kimi etimadı doğruldacaq”.