Sülh müqaviləsinin təşəbbüskarı Azərbaycan oldu | Prezident İlham Əliyev

“İkinci Qarabağ müharibəsi başa çatanda Ermənistan-Azərbaycan gələcək əlaqələri və təmasları sahəsində bir boşluq, vakum yaranmışdı”.

Bunu Prezident İlham Əliyev ABŞ səfərinin nəticələri ilə bağlı mediaya müsahibəsində deyib. Dövlət başçısı bildirib ki, o vaxt hələ fəaliyyət göstərmək istəyən ATƏT-in Minsk Qrupu da demək olar ki, iflic vəziyyətinə düşmüşdü.

“Onlar da bilmirdilər ki, nə etmək lazımdır. Çünki Azərbaycan bütün məsələləri beynəlxalq hüquq çərçivəsində özü həll edib. Hərbi-siyasi yollarla Qarabağ münaqişəsi öz həllini tapdı. Məhz Azərbaycan o vaxt gələcək baxışlarını ortaya qoydu. Yəni bu boşluq çox davam edə bilməz. Azərbaycan və Ermənistan arasında sülh müqaviləsi olmalıdır. Onun təşəbbüskarı biz olmuşuq. O təşəbbüsü biz irəli sürəndən sonra yenə də heç yerdən cavab gəlmədi. Onda biz məlum əsas 5 prinsipi ortaya qoyduq və bunun üzərində sülh sazişinin mətnini də biz hazırlamışdıq”, – deyə Prezident qeyd edib.