Sülh sazişi imzalanmağa hazırdır | Ermənistan XİN məlumat yaydı

Ermənistan Xarici İşlər Nazirliyi Azərbaycanla sülh və dövlətlərarası münasibətlərin qurulması haqqında Saziş layihəsinin razılaşdırılması və bu barədə danışıqların başa çatması faktını təsdiq edib.

Bu barədə Ermənistan XİN məlumat yayıb.

Bildirilib ki, rəsmi İrəvan diplomatik kanallarla Azərbaycan XİN-ə Ermənistan Respublikası ilə Azərbaycan Respublikası arasında sülh və dövlətlərarası münasibətlərin qurulması haqqında Saziş layihəsinin iki razılaşdırılmamış maddəsi üzrə Bakının təkliflərini qəbul etdiyinə dair məlumat verib.

“Beləliklə, sülh sazişi imzalanmağa hazırdır. Ermənistan sənədin imzalanma vaxtı və yeri barədə Azərbaycanla məsləhətləşməyə hazırdır”, – deyə açıqlamada qeyd olunub.

Qeyd edək ki, bundan əvvəl Azərbaycanın xarici işlər naziri Ceyhun Bayramov sülh sazişinin mətni ilə bağlı danışıqlar prosesinin yekunlaşdığını açıqlayıb.

Bildirib ki, açıq qalan iki maddə üzrə Ermənistan Azərbaycan tərəfinin təkliflərini qəbul edib. Ceyhun Bayramovun sözlərinə görə, növbəti addım olaraq Azərbaycanın gözləntisi Ermənistanın öz Konstitusiyasında dəyişiklik etməsidir.