Tavuşun erməni sakinləri ilə polis arasında qarşıdurma

Ermənistanın Tavuş vilayətinin Kirants kəndində etirazçılar yolu bağlayıblar. Nəticədə kəndə giriş-çıxış bloklanıb.

Sakinlərdən yolu açmaqları istənilsə də, onlar buna məhəl qoymayıb. Nəticədə polislə kəndlilər arasında toqquşma yaşanıb.

Ölkənin Daxili İşlər Nazirliyinin yaydığı məlumata görə, artıq 31 nəfər polis əməkdaşları tərəfindən saxlanılıb.

Bütün bunların fonunda, etirazların hökumətə heç bir təsiri olmadığını görən nümayişçilər gülünc bir yola əl atıblar. Onlar Tavuşdakı mübarizənin simvoluna çevirdikləri 96 yaşlı Lena Qardaşyan adlı qoca qadını növbəti dəfə iğtişaşların keçirildiyi əraziyə gətiriblər.

Nümayişçilərin iddiasına görə, qadın polisin kəndə basqın edərək etirazları dağıtması zamanı xəsarət alıb. Sosial şəbəkələrdə yayılan görüntülərdə isə onun sadəcə huşunu itirməsi və kənd sakinlərinin köməyinə yetişməsi öz əksini tapıb.