Təxribat törədən ermənilərin Sumqayıt məhkəməsində etirafı

Azərbaycanın dövlət sərhədini pozmaqda və ağır cinayətlər törətməkdə təqsirləndirilən Ermənistan vətəndaşı olan hərbi qulluqçular – Ovagimyan Arutyun Yurikoviç və Kazaryan Karen Aşotoviçin cinayət işi üzrə məhkəmə başlayıb.

Sumqayıt Ağır Cinayətlər Məhkəməsində keçirilən prosesə hakim Fəhmin Hümbətov sədrlik edib. Təqsirləndirilən şəxslər vəkillərlə və tərcüməçi ilə təmin edilib.

Anket məlumatlarında qeyd edilib ki, Arutyun Ovagimyan 1989-cu ildə Ermənistanda anadan olub və Gorus rayonunda yerləşən hərbi hissəsində çavuş kimi müddətdən artıq xidmət keçir. Karen Kazaryan isə 2004-cü ildə Ermənistanda anadan olub və Gorus rayonunda yerləşən hərbi hissədə müddəti hərbi xidmət keçən hərbi qulluqçudur.

Prosesdə daha sonra iş üzrə zərərçəkmiş kimi tanınan Eltun Sərkərli, Rza Allahverdiyev, Asif Babaşov və İbrahim Şıxlarovun anket məlumatları dəqiqləşdirilib. Bildirilib ki, zərərçəkmiş şəxslər Dövlət Sərhəd Xidmətinin hərbi qulluqçularıdır.

Ermənilər əməllərindən peşman olduqlarını bildiriblər. Məhkəmənin baxış iclası iyulun 5-nə təyin edilib.