Tiqran Balayanın Azərbaycana qarşı təxribatına səfirdən tutarlı cavab

“Ermənistan hökuməti” adlanan irqçi fırıldaqçılar və faşist cinayətkarlar dəstəsi 1987-2000-ci illərdə Azərbaycan xalqına qarşı törətdikləri cinayətlərə görə məsuliyyətə cəlb olunacaqlar”.

Bu barədə Azərbaycanın Belçika və Lüksemburqdakı səfiri Vaqif Sadıqov sosial şəbəkə hesabında Ermənistanın Belçika və Lüksemburqdakı səfiri Tiqran Balayanın Azərbaycana qarşı təxribat xarakterli paylaşımına cavab olaraq yazıb. Səfir Ermənistanın cinayətkar əməllərinin bir neçəsini nümunə olaraq göstərib.

“O vaxt əhalinin 10 faizini təşkil edən Qərbi Azərbaycanda 300 000-dən çox azərbaycanlının öz tarixi torpaqlarından qovularaq insan hüquqlarının kütləvi şəkildə pozulması və etnik təmizləməyə məruz qalması, deportasiya zamanı yüzlərlə insanın qətlə yetirilməsi; 1990-1992-ci illərdə 50 000 azərbaycanlıya qarşı etnik təmizləmə aparılması, onlardan yüzlərləsinin erməni silahlıları tərəfindən öldürülməsi; 1992-1994-cü illərdə Azərbaycanın ərazi bütövlüyünün pozulması və onun beynəlxalq səviyyədə tanınmış ərazilərinin 20%-nin Ermənistan tərəfindən işğalı; Azərbaycanın işğal olunmuş 7 rayonundan 700 mindən çox azərbaycanlının etnik təmizlənməsi, 9 şəhər və yüzlərlə kəndin dağıdılması və yer üzündən silinməsi; 1992-ci ilin fevralında Azərbaycanın Xocalı şəhərində qocalar, qadınlar, uşaqlar da daxil olmaqla 600-dən çox mülki şəxsin qətlə yetirilməsi”, – deyə paylaşım edən diplomat ermənilərə tarix dərsi keçib.