Tramp Çin avtomobillərinin ABŞ-də istehsalına niyə razıdır? - “Əsas məsələ odur ki...” - Baku TV

“Çin son 4-5 ildə avtomobil istehsalını çox sürətli və güclü şəkildə həyata keçirir. Bu da Qərb ölkələrindəki avtomobil istehsalçılarında böyük narahatlıq doğurur və onların bazardan sıxışdırılıb çıxarılması ilə nəticələnə bilər”.

Bu sözləri iqtisadçı İsmayıl Məmmədov Çin avtomobillərinin ABŞ-də istehsalının ölkə bazarına təsirlərini şərh edərkən bildirib.

Onun sözlərinə görə, məsələyə həm siyasi, həm də diplomatik aspektlərdən baxmaq lazımdır:

“Burada təkcə avtomobil istehsalı və kapital axını deyil, texnoloji axınlar da nəzərə alınmalıdır. Yeni texnologiyaların ölkəyə gətirilməsi və iş yerlərinin yaradılması hər bir dövlət üçün vacibdir. Çin avtomobil bazarında liderliyini qoruduğu üçün ölkələr bu zavodların məhz öz ərazilərində açılmasında maraqlıdır. Çin avtomobillərinin Meksika üzərindən ABŞ-yə idxal olunması Amerika bazarında onların payını artırır, bu isə yerli sənayenin texnoloji baxımdan geri qalması riskini yaradır. Amerikalı siyasətçilər də məhz buna görə istehsalın ölkə daxilində qurulmasının tərəfdarıdırlar. Bu həm də ticarət müharibələrini daha idarəolunan səviyyədə saxlamağa kömək edəcək”.