“Tramp nəzarəti ya Azərbaycana verəcək, ya da...” | Zəngəzur dəhlizi məsələsində xaos

“Zəngəzur dəhlizi məsələsi ətrafında vəziyyət tamamilə dəyişib”.

Bunu erməni politoloq Manvel Sərkisyan deyib.

“Vəziyyət tamamilə dəyişib, Vaşinqtonda baş verən bu idi: ABŞ İrəvandan Ermənistan ərazisinin bir hissəsini (Zəngəzur dəhlizini) icarəyə götürmək hüququ aldı. Qalan hər şey söz-söhbətdir, hətta o üçtərəfli memorandumda da o ərazinin necə olduğu qeyd olunmur, sadəcə, Ermənistanın Azərbaycana belə bir yol verməsindən bəhs olunur. Bu yol haradan keçəcək, uzunluğu-eni nə qədər olacaq – yazılmayıb, sərhədlərlə bağlı da naməlum vəziyyət hökm sürür”, – ekspert qeyd edib.

Sərkisyanın iddiasına görə, ABŞ nəzarət hüququ əldə etdiyi Zəngəzur dəhlizini Türkiyə və ya Azərbaycana təhvil verə bilər: 

“Bu, Trampın planıdır. ABŞ-yə autsorsinq o deməkdir ki, başqa bir dövlət hansısa dövlətin suveren ərazisini bir müddət özü üçün ala, sonra da başqasına verə bilər. Bu, heç bir halda suverenliklə, ərazi bütövlüyü ilə bağlı olmayan məsələdir. Bu, artıq Vaşinqtonda baş verib. Çoxları fikirləşir ki, bu, Rusiyanın, İranın məğlubiyyətidir, belə bir şey yoxdur. Bu ölkələrin bəyanatlarını görmüşük, çox sakitdirlər. Bu o deməkdir ki, hamı əvvəlcədən danışıb, razılaşıb. Yəqin ki, hamı nəsə alıb”.