Trampın andiçməsindən sonra nələr baş verdi? | Deportasiyaların iqtisadiyyata sarsıdıcı ziyanı

ABŞ Prezidenti Donald Trampın andiçmə mərasimindən dərhal sonra ABŞ-də qanunsuz immiqrasiya ilə bağlı sərt tədbirlər həyata keçirilir. Ölkə ərazisinə qeyri-leqal yollarla daxil olanlar hər gün hərbi təyyarələrlə deportasiya olunurlar.

Son illər ABŞ-yə müxtəlif məqsədlərlə üz tutan soydaşlarımızın da sayı kifayət qədərdir. Yaşama və işləmə icazəsi olmayanlar Amerika xəyallarını reallaşdırmaq üçün Meksika sərhədindən istifadə edirlər. Bura deportasiya ilə bağlı ən sərt addımların atıldığı zonadır.

ABŞ-də yaşayan jurnalist Qənirə Ataşova deyir ki, hələlik azərbaycanlılar arasında deportasiya ilə üzləşənlər olmasa da, mövcud vəziyyət bu ölkəyə üz tutan həmyerlilərimiz arasında da narahatlıq yaradıb.

“Buradakı azərbaycanlılar sözügedən məsələyə görə narahatdırlar. Çox şükür ki, hələlik soydaşlarımız arasında belə hal yaşanmayıb. Sərhədi keçərkən sənəd alan şəxslər bu deportasiyadan yan qaça bilərlər. Amerika miqrantlardan formalaşan ölkədir. Çünki buradakı bütün ağır işlərdə miqrant əməyindən istifadə olunur. ABŞ vətəndaşları bu işlərə cəlb olunmurlar”, – deyə Qənirə Ataşova əlavə edib.