Trampın "Atom bombası" işə düşdü, Azərbaycan üçün fürsət, yoxsa təhlükə?! | GLOBAL PANORAMA

“Global Panorama” verilişinin yeni buraxılışı yayımlanıb.

Proqramın budəfəki buraxılışında ABŞ Prezidenti Donald Trampın yeni fərmanından bəhs olunub. Belə ki, həmin fərmana əsasən, artıq ABŞ-yə gətirilən mallara ölkədən asılı olaraq minimum 10% gömrük rüsumu tətbiq olunacaq.

Bildirilib ki, əsas hədəf Çin və Avropa İttifaqı olsa da, Azərbaycan da daxil olmaqla inkişaf etməkdə olan ölkələr bu yeni rüsumlardan yan keçə bilməyib. Artıq Azərbaycan ABŞ-yə 10% gömrük rüsumu ödəməlidir.

2024-cü ildə Azərbaycanla ABŞ arasında ticarət dövriyyəsinin dəyəri 1 milyard 753 milyon Amerika dolları təşkil edib ki, bu da 2023-cü illə müqayisədə təxminən 94% çoxdur. Yəni il ərzində bu ölkə ilə ticarətimizdə iki dəfəyə yaxın artım olub. O cümlədən, ötən il Azərbaycan Amerikaya 135 milyon dollarlıq mal, əsasən xam satıb, əvəzində ABŞ-dən 1 milyard 618 milyon dollarlıq mal alıb.

Göründüyü kimi, Azərbaycanın ixracında Amerikanın payı elə də böyük deyil və cəmi 0,5 faizdir. Bu o deməkdir ki, yeni tariflərin milli iqtisadiyyata birbaşa təsiri nəzərəçarpacaq dərəcədə olmayacaq.

Bununla belə, bu tariflərin Azərbaycan iqtisadiyyatına dolayı təsiri hiss olunacaq dərəcədə ola bilər. Yəni qlobal iqtisadi böhran yaranarsa, əmtəə brijalarında neft-qaz qiymətlərinin aşağı düşməsi baş verə bilər. Bu isə iqtisadiyyatı enerji daşıyıcılarının ixracından asılı olan Azərbaycana ciddi təsir göstərə bilər.

Həmçinin fond brijalarında eniş olsa, Dövlət Neft Fondunun və Mərkəzi Bankın valyuta ehtiyatları hesabına qlobal maliyyə bazarlarında əldə edilmiş aktivlərin bir hissəsi dəyərini itirə bilər.