Türkiyə xalqından Ərdoğana böyük etimad

Türkiyə xalqı növbəti dəfə demokratiya sınağından üzü ağ, başı uca çıxdı.

Xalq siyasi liderinə növbəti dəfə etimad göstərməklə, prezident seçkilərinin ikinci turunda da Rəcəb Tayyib Ərdoğanın parlaq qələbəsini indidən qaçılmaz etdi. Çünki parlamentdə böyük səs çoxluğu ilə "Cümhur İttifaqı"nın qalib gəlməsi, analoji nəticənin prezident seçkilərində də qeydə alınacağını qaçılmaz edir. Bu həm də bəzi antitürk dairələrin Türkiyəyə və onun liderinə qarşı çirkin niyyətlərinin bir daha puça çıxmasından xəbər verir.

Təbii ki, idarəetmə sisteminin stabil və uğurlu işləməsi üçün prezidentin təmsil olunduğu partiyanın parlamentdə səs çoxluğuna malik olması lazımdır. Əgər prezident seçkisində qalib gələn partiya məclisdə üstünlük əldə etməsə, aydındır ki, bu, ciddi daxili siyasi böhrana səbəb ola bilər. Deməli, Türkiyə vətəndaşları ən azı ölkədə sabitliyin pozulmaması naminə parlamentdəki nəticəni, prezident seçkilərinə də daşımalıdır. Bu isə R.T.Ərdoğanın növbəti dəfə Türkiyə Prezidenti seçilməsini qaçılmaz edir.

Bir sözlə, bu seçkilər qardaş ölkənin demokratik ənənələrə sədaqətinin, R.T.Ərdoğanın isə hələ də Türkiyə dövləti üçün lider olmağa qadir olduğunun göstəricisidir. Çünki nəticələr xalqın öz liderinə dəstəyini bir daha ifadə etdi.