Türkiyədə prezident seçkilərinə sayılı günlər qaldı

Türkiyə seçkilərin mayın 28-də keçiriləcək II turunda yeni liderini seçməyə hazırlaşır. Hazırkı Prezident Rəcəb Tayyip Ərdoğan Cümhur İttifaqının, CHP-nin təmsilçisi Kamal Kılıçdaroğlu Millət İttifaqının namizədi olaraq qarşı-qarşıyadır.

Seçkilərin I turunda R.T.Ərdoğan 49.52%, K.Kılıçdaroğlu isə 44.88% səs topladı ki, bu da seçimlərin tək səfərdə bitməsi üçün kifayət etmədi. Çünki Türkiyə seçki qanununa görə, namizədlərdən biri 50%-dən artıq səs toplamalıdır.

Təbii ki, prezidentin kim olması barədə qərarı Türkiyə xalqı verəcək, lakin bir həqiqət var ki, bu seçkilər bütün dünyada böyük maraqla izlənir. Türk dünyası və müsəlman coğrafiyasında R.T.Ərdoğana dəstək daha çoxdur. Azərbaycanda keçirilən sorğularda, ictimai rəylərdə də əsas dəstək R.T.Ərdoğanadır.

Xalqımızın R.T.Ərdoğanı dəstəkləməsi səbəbsiz deyil. Biz Vətən müharibəsində dostu da, düşməni də çox yaxşı tanıya bildik. Sona qədər Azərbaycanın yanında olan R.T.Ərdoğan maddi-mənəvi bütün resurslarını ölkəmiz üçün səfərbər etdi. Qarabağ səmasını bəzəyən "Bayraktar" PUA-ları düşmənin gözünə qorxu salsa da, xalqımıza sevinc gözyaşı bəxş etdi. Siyasi arenada güc və söz sahibi olan Türkiyə Cümhuriyyəti böyük qardaş kimi əlini çiynimizdən çəkmədi və ölkə başçısı İlham Əliyevin uğurlu siyasəti nəticəsində torpaqlarımız 44 gün ərzində düşməndən azad olundu.