Türkiyədəki "Azərbaycan Məhəlləsi"ndə nələr olacaq? | Detallar açıqlandı

2023-cü ilin fevral ayında Türkiyədə baş verən dəhşətli zəlzələdən dərhal sonra Prezident İlham Əliyevin tapşırığına əsasən, qardaş ölkənin Kahramanmaraş bölgəsində inşa olunan “Azərbaycan” yaşayış məhəlləsinin tikintisi başa çatmaq üzrədir.

Layihəyə əsasən, məhəllə yaşayış binaları, ibtidai məktəb və uşaq bağçası, mədəniyyət mərkəzindən ibarətdir. Məhəllənin ümumi sahəsi 28,5 hektar təşkil edir. Yaşayış məhəlləsində 2, 3 və 4 otaqlı ümumilikdə 1300 mənzildən ibarət 71 yaşayış binası inşa olunacaq.

Eyni zamanda həmin ərazidə məskunlaşacaq sakinlərin iş yerləri ilə təmin olunması məqsədilə yaşayış binalarında 764 ticarət obyekti istifadəyə veriləcək. “Azərbaycan” yaşayış məhəlləsinin ümumi dəyərinin 100 milyon ABŞ dolları dəyərində hissəsi ölkəmiz tərəfindən inşa ediləcək.

Hazırda “Azərbaycan” məhəlləsinin baş planı üzrə 7, 8, 11 və 12-ci kvartallarının tikintisi yekunlaşmaq üzrədir. 4 kvartalda 26 yaşayış binası yerləşir. Binaların hamısı 4 mərtəbəlidir. Ümumilikdə 456 mənzil, 328 qeyri-yaşayış obyekti inşa edilir.

Qeyd edək ki, 2023-cü il sentyabrın 25-də Naxçıvan şəhərində Azərbaycan Respublikası Hökuməti ilə Türkiyə Respublikası Hökuməti arasında Türkiyə Respublikasının Kahramanmaraş vilayətində yaşayış binaları, ibtidai məktəb, uşaq bağçası və mədəniyyət mərkəzinin tikilməsi haqqında “Əməkdaşlıq Sazişi” imzalanıb.