Türkiyəli nazir müavini islam dünyasının əmək bazarından danışdı

“Əgər islam dünyasında güclü araşdırma-inkişaf büdcələrimiz və beynəlxalq səviyyədə tanınan markalarımız olmazsa, gənclərimizin əməyinə yüksək dəyər verilmə şansı yaranmır. Çünki yüksək gəlirlər əsasən tədarük zəncirinin sonunda və ya bu prosesə moderatorluq edən beynəlxalq markaların əlində qalır”.

Bunu Türkiyənin əmək və sosial müdafiə nazirinin müavini Lütfihak Alpkan Bakıda jurnalistlərə açıqlamasında deyib.

Nazir müavini vurğulayıb ki, məhsul Çində istehsal oluna bilər, lakin onun markası ABŞ mənşəli olur:

“Oxşar vəziyyət Afrika və Asiyanın bir çox ölkələrində də müşahidə edilir – gənclərin əməyi real qarşılığını tapa bilmir. Eyni təhsili almış, eyni universitetdən məzun olmuş mühəndislər belə müxtəlif ölkələrdə formalaşan əmək bazarlarında qeyri-bərabər şərtlərlə üzləşirlər. Yerli əmək bazarında rəqabət mühitinin məhdud olması səbəbindən onlar fərqli maaşlar alırlar. Bunun nəticəsində islam dünyasının gəncləri daha yüksək gəlir əldə etmək üçün beyin axını ilə Qərb ölkələrinə köçməyə məcbur qalırlar. Ölkələrində qaldıqları halda isə əsasən beynəlxalq markalar üçün çalışırlar”.