Türkiyənin Ukraynaya dəstəyi Lavrovu dilə gətirdi | Düşündürən açıqlama

“Türkiyə-Rusiya münasibətlərində soyuqluq var və bu, kifayət qədər hiss olunur”.

Bu fikirləri Baku TV-nin departament rəhbəri, jurnalist Turan İbrahimov deyib.

O qeyd edib ki, xüsusilə Rusiya mediasında Türkiyəyə istiqamətlənmiş ittihamların dozası getdikcə artmağa başlayıb:

“Müxtəlif istiqamətlər üzrə Türkiyəni artıq ittiham etməyə başlayıblar. Xüsusilə də bir müddətdir ki, səsi kəsilmiş ermənipərəst ictimai xadimlərin də dili sözün əsl mənasında uzanıb. Qabartdıqları məqam budur ki, Orta Asiyadakı Türk dövlətlərini Türkiyə yavaş-yavaş öz tərəfinə çəkir, öz çətiri altında birləşdirir, məqsəd də Rusiyanın bu bölgədəki təsirini minimuma endirməkdir”.

Jurnalistin sözlərinə görə, Türkiyə mediasında da Rusiya ilə bağlı əvvəllər səsləndirilməyən iddialar ortaya atılır:

“Məhz Suriyada Rusiyanın müəyyən fəaliyyət istiqamətləri tənqid olunur. Türkiyə və Rusiya Avrasiya bölgəsində həlledicidir. Anlaşılan odur ki, Suriyada Türkiyənin indiki məqamda Rusiyanın maraqlarına uyğun olmayan, Qərb dövlətləri ilə razılığa gələrək addımlar atması Rusiyanı qıcıqlandırır.

Bundan əlavə, ən önəmli faktor Ukraynanın taleyi ilə bağlı Türkiyənin tutduğu mövqedir ki, Rusiyanı özündən çıxarır və Sergey Lavrov səviyyəsində müəyyən məsələlər dilə gətirilir. Türkiyə tərəfi deyir ki, Rusiya-Ukrayna müharibəsi bitəcəksə, bu, mütləq Ukraynanın ərazi bütövlüyü çərçivəsində başa çatmalıdır və 1991-ci il sərhədlərinə qədər hər şey müəyyənləşməli, Rusiya oradan çıxmalıdır. Bu da indiki məqamda Rusiya üçün qəbul olunmazdır”.