Ukrayna və Azərbaycanın əlaqələri möhkəmlənir | Münasibətlərdə yeni səhifə

Ukrayna nümayəndə heyətinin Laçın şəhərinə səfəri gerçəkləşib.

Səfərin məqsədi Azərbaycanın Laçın və Ukraynanın İrpen şəhərlərinin qardaşlaşması haqqında memorandumun imzalanması olub.

Görüşdə Laçın rayonunda Azərbaycan Respublikası Prezidentinin xüsusi nümayəndəsi Məsim Məmmədov və nümayəndəliyin məsul şəxsləri, Ukrayna nümayəndə heyətinin üzvləri – İrpen şəhərinin meri Oleksandr Markuşin və Ukraynanın ölkəmizdəki səfirinin birinci katibi Andrey Onişenko iştirak ediblər.

Sözügedən memorandum Laçın rayonunda Azərbaycan Respublikası Prezidentinin xüsusi nümayəndəsi Məsim Məmmədov və İrpin şəhər meri Oleksandr Markuşin arasında imzalanıb.

Məsim Məmmədov jurnalistlərə açıqlamasında bildirib ki, memorandumun imzalanması şəhərlərimizin tarixi mədəniyyəti və həyatı ilə yaxından qarşılıqlı şəkildə tanış olması, həm də dostluq əlaqəsinin yaradılması üçün nəzərdə tutulub.

“Ukrayna ilə Azərbaycan arasında mövcud olan dostluq əlaqələrimizi rəsmi olaraq möhkəmləndiririk. Bu gün biz münasibətlərimizin inkişafında yeni səhifə açırıq. Qarşıda mədəni mübadilələr, iqtisadi təşəbbüslər olacaq. Biz bir-birimizdən öyrənib, gələcək təcrübə mübadiləsinə, o cümlədən icmalar üçün birgə səmərəli işlərin qurulmasına töhfə verəcəyik”, – deyə İrpen şəhərinin meri Oleksandr Markuşin bildirib.