Ukraynada soydaşlarımızın iştirakı ilə müharibə əleyhinə konfrans keçirildi

Kiyevdə Ukraynanın müxtəlif regionlarını təmsil edən Azərbaycan diaspor təşkilatlarının nümayəndələrinin iştirakı ilə ölkədə Rusiyanın apardığı müharibənin əleyhinə konfrans keçirilib.

Bildirilib ki, məqsəd yaşadıqları ölkənin işğalına qarşı azərbaycanlıların birliyini daha da gücləndirmək, Ukraynaya xaricdən humanitar və maddi yardımı artırmaq, o cümlədən beynəlxalq arenada dezinformasiyaya qarşı mübarizəni gücləndirməkdir. Konfransda Ukraynanın dövlət və hökumət nümayəndələri, Ali Radanın deputatları iştirak ediblər.

Diaspor nümayəndəsi Rövşən Tağıyev bildirib ki, müharibədə çox sayda azərbaycanlı hərbçi ölüb: “Biz Ukrayna üçün bu çətin dövrdə nələr etdiyimiz barədə məlumat verdik. Məsələn, humanitar yardımlar göstəririk, Ukraynada yaşayan azərbaycanlılar bu müharibədə döyüşürlər. Bu müharibədə çox sayda azərbaycanlı hərbçi ölüb və yaralanıb. Ukraynaya beynəlxalq təşkilatlar çərçivəsində də yardım göstəririk. Biz konfransda Ukraynanın hüquqi baxımdan müdafiəsinə dəstək göstərilməsini də müzakirə etdik. Bundan sonra da səylərimizi koordinasiya edəcəyimiz barədə razılaşdıq”.

Konfransda dünya ölkələrindən Ukraynaya humanitar və maddi dəstəyin artırılması üçün konqresin daha da fəal olması ilə bağlı qərarlar qəbul edilib.