Ukraynalı deputatlar Müstəqillik günü ilə bağlı Azərbaycanı təbrik etdi

Ukraynanın paytaxtı Kiyevdə Azərbaycanın müstəqilliyinin 106-cı ildönümü münasibətilə tədbir keçirilib.

Azərbaycanın bu ölkədəki səfirliyi tərəfindən təşkil olunan tədbirdə müxtəlif ölkələrdən rəsmi nümayəndələr, deputatlar, ekspertlər, elm və incəsənət nümayəndələri iştirak ediblər.

Görüşdə çıxış edən səfir Seymur Mərdəliyev ölkəmizin müstəqillik tarixi barədə məlumat verib. Bildirib ki, ulu öndər Heydər Əliyevin əsasını qoyduğu, müzəffər Ali Baş Komandan, Prezident İlham Əliyevin uğurlu strategiya ilə idarə etdiyi Azərbaycan bu gün regionun ən qüdrətli dövlətidir.

Ukraynanın xarici işlər nazirinin müavini Yevgeni Perebiynis isə Ukrayna-Azərbaycan əlaqələrindən danışaraq Bakının Kiyevə verdiyi humanitar yardımın və siyasi dəstəyin önəmini qeyd edib.

Daha sonra tədbirdə deputatlar da çıxış ediblər.

Ali Radanın deputatı Andrey Kloçko Azərbaycan xalqını öz torpaqlarının birləşdirilməsindən sonra Müstəqillik Gününü qeyd etməsi münasibətilə təbrik edib:

“Biz bütün Ukrayna xalqı adından səmimi qəlbdən edirik bu təbriki. Ölkənizə firavanlıq arzulayırıq. Azərbaycan xalqına daim azadlıq və ölkənizin əmin-amanlıq yuvası olmasını arzulayırıq. Azərbaycanın Ukraynaya yardımı çox faydalı, çox vaxtında idi.

Qaçqınlarımızı qəbul edib sığınacaq verilməsinə görə Azərbaycan Prezidentinə və xalqına, həmçinin Azərbaycan Dövlət Neft Şirkətinin göstərdiyi humanitar yardıma görə dərin minnətdarıq. Azərbaycan dövləti Ukraynada dağıdılmış və ya zədələnmiş məktəbləri, uşaq bağçalarını, infrastruktur obyektlərini bərpa edib. Bu, təqdirəlayiq haldır”.

Sonda onu da qeyd edək ki, tədbir zamanı hava hücumu xəbərdarlığı ilə bağlı həyəcan siqnalları verilsə də, görüş davam edib.