Ukraynanın keçmiş prezidenti Heydər Əliyev haqqında danışdı

Azərbaycanın ümummilli lideri Heydər Əliyev 100 illik yubileyi ərəfəsində tək ölkəmizdə yox, başqa ölkələrdə də xatırlanır. Xüsusilə keçmiş sovet ölkələrində onun xidmətlərinin nəticəsi bu gün də anılır.

SSRİ dağıldıqdan sonra Azərbaycanın müstəqil dövlətçiliyinin əsasını quran Heydər Əliyevin həmin dövrdə yeni müstəqillik qazanmış keçmiş sovet ölkələri ilə təması davam edib. Bunlardan biri Ukraynadır.

Ukraynanın keçmiş prezidenti Viktor Yuşşenko Baku TV-nin Şərqi Avropa bürosunu iqamətgahına dəvət edərək, Heydər Əliyevlə bağlı xatirələrini bölüşüb, hətta 1990-cı ildə onunla Naxçıvandakı görüşü barədə ilk dəfə mətbuata danışıb.

“Heydər Əliyev Moskvadan qayıdıb Bakıdakı məlum hadisələrə görə Naxçıvana gedəndə məndən ölkənizin beynəlxalq hesablaşma sistemini təşkil etməkdə yardım göstərməyimi istədi. Onunla ilk görüşümüz məhz onda baş tutdu. Çox qayğılı insan təsiri bağışlayırdı. Uşaq bağçasının yerləşdiyi binanın 2-ci mərtəbəsində onun iş kabineti var idi. Şəhərə çıxıb maşınla dolaşdıq. Xatırlayıram, bütün dükanlarda, obyektlərdə güllə izləri var idi. Çoxlu sayda insan küçələrə axışmışdı, amma indi hamısı Heydər Əliyevi dəstəkləyirdi”, – deyə V.Yuşşenko bildirib.