Ulu Öndərin xatirəsi Kiyevdə anıldı | Heydər Əliyev hamıya göstərdi ki...

Azərbaycanın ümummilli lideri Heydər Əliyevin vəfatının 21-ci ildönümü ilə bağlı Kiyevdə abidəsi ziyarət olunub.

Heydər Əliyev adına parkda keçirilən anım tədbirinə Azərbaycanın Ukraynadakı səfiri Seymur Mərdəliyev başda olmaqla diplomatlar, Türkiyənin Ukraynadakı səfirliyinin əməkdaşları, eləcə də “SOCAR ENERGY UKRAINE” və GUAM-ın nümayəndələri qatılıblar.

Ukraynanın tanınmış siyasi və ictimai xadimləri Heydər Əliyev siyasi məktəbinin dünya üçün əhəmiyyətini qeyd ediblər.

Kiyev Milli Universitetinin rektoru Volodimir Buqrov Heydər Əliyevi 20-ci əsrin xüsusiyyətlərini əks etdirən şəxsiyyət adlandırıb.

“Bu həm Ukraynanın, həm də Azərbaycanın sovet imperiyasının dağılmasından sonra müstəqillik əldə etməsi yolunda bir məktəbdir. Heydər Əliyev xalqının milli mənafeyininin nə dərəcədə vacib olduğunu dünyaya çatdırırdı. Bu, əslində unikal siyasi dəyərdir və bundan digər ölkələr öyrənməlidirlər. Siyasətçinin, dövlət xadiminin ağlı, liderin düşüncələri nəinki bizim bağlı olduğumuz 20-21-ci əsrdə lazımdır, bunlar həm də tarixi qeydlərdir. Xüsusən də bugünkü olaylar fonunda çox lazımdır. Bu qeydlər bizə ölkənin müstəqilliyinin necə qorunub saxlanmasını öyrədir. Bu bizim Heydər Əliyevdən götürə biləcəyimiz ən vacib örnəkdir”, – V.Buqrov əlavə edib.

Qeyd edək ki, Kiyevdə ümumilli lider Heydər Əliyev adına parkın açılışı 2013-cü ildə onun 90 illiyi ərəfəsində olub. Parkda Azərbaycan dövlətinin dirçəlişinin rəmzi kimi ulu öndərin abidəsi ucaldılıb.