UNESCO Xınalıqla bağlı məlumat yaydı: ərazilərimiz dünyada tanınacaq

Azərbaycanın “Xınalıq və Köç yolu mədəni landşaftı” adlı nominasiya ərazisi UNESCO-nun Ümumdünya İrs Siyahısına daxil edilib.

Bu haqda qərar təşkilatın Ümumdünya İrs Komitəsinin Səudiyyə Ərəbistanının Ər-Riyad şəhərində keçirilən 45-ci sessiyasında qəbul olunub.

Dövlət Turizm Agentliyinin hazırladığı nominasiyaya əsasən, Ümumdünya İrs Ərazisi Xınalıq kəndi də daxil olmaqla, yerli əhalinin istifadə etdiyi ətraf yaylaq Quba-Qusar və Mərkəzi Aran bölgəsinə düşən qışlaq ərazilərini Abşeron və Hacıqabul, həmçinin onların arasında uzunluğu 200 km-dən çox olan tarixi Köç yolunu-Quba-Şamaxı-Qobustanı əhatə edir.

UNESCO-ya təqdim edilən sənədin əsasını Xınalığın köçəri mədəniyyəti təşkil edir. Əks etdirdiyi ümumbəşəri dəyərlər nəzərə alınmaqla unikallığı ilə seçilən bu zəngin irs “Xınalıq və Köç yolu mədəni landşaftı” adlı nominasiya sənədi 2021-ci ildə Ümumdünya İrs Komitəsinə təqdim edilib.

Dövlət Turizm Agentliyinin sədri Fuad Nağıyev sənəddəki köç yolunun nümunəvi tarixi-iqtisadi model kimi təkcə Azərbaycanın deyil, bütün dünya irsinin nadir nümunələrindən olduğunu qeyd edib.