Xankəndidə verdiyim səs separatçıların tabutuna vurulan son mismar idi | Prezident

Məlum olduğu kimi, Xankəndi erməni separatçılarının uzun müddət Azərbaycana qarşı işğalçılıq və soyqırımı cinayətləri həyata keçirmək üçün istifadə etdikləri yer olub.

Məhz separatçılıq, ərazi bütövlüyümüzə qəsdin təməli də Xankəndidə qoyulub. Prezident İlham Əliyev də buna işarə edərək bildirib ki, Xankəndidə başlayan separatçılıq elə Xankəndidə də süquta uğradı və Azərbaycan suverenliyini bərpa edərək həm də haqq-ədalətin qələbəsini təmin etdi.

Xankəndinin azad edilməsi və orada dövlət başçısı tərəfindən bayrağımızın dalğalandırılması Azərbaycanın qüdrətinin əyani sübutu idi. Ölkə rəhbərinin inaqurasiya mərasimində səsləndiriyi fikirlər də göstərdi ki, Azərbaycanda separatizm heç vaxt baş qaldıra bilməz və dövlətimiz bir daha erməni millətçiliyinin işğalçılıq hədəfində olmayacaq.

Azərbaycan Vətən müharibəsi və son antiterror tədbirləri ilə hansı qüdrətə malik olduğunu sübut edib. Bunun nəticəsidir ki, artıq bütün dünya bizimlə razılaşır və şərtlərimizi qəbul edir. Yaranan yeni reallığı isə heç kəs dəyişə bilməz.