Xarici KİV Messinin Bakı səfərindən nə yazdı? | Dünya ulduzundan ölkəmizə təşəkkür

“Bizdən nə danışırlar?” verilişinin yeni buraxılışı yayımlanıb.

Verilişdə bildirilib ki, bu gün dünyanın yeni siyasi düzəni formalaşır, illərlə öz haqqı uğrunda çarpışan xalqlar və dövlətlər söz sahibinə çevrilir. Dünyada baş verən geosiyasi proseslər, hərbi münaqişələr, müharibələr, iqtisadi təlatümlər və qlobal məsələlər bəşəriyyəti düşündürür.

Qeyd olunan məqamların fonunda Azərbaycanın xarici siyasəti dünya mediasının diqqətindən hər zamankı kimi yayınmayıb.

Rusiyanın “Vestnik Kavkaza” nəşri dünya futbolunun ulduzu Lionel Messinin Bakıya səfəri ilə bağlı xəbər yayımlayıb.

Bildirilib ki, o, Azərbaycana səfəri çərçivəsində komanda yoldaşları ilə birlikdə bir sıra simvolik məkanlarda olub və azarkeşləri ilə görüş keçirib.

Futbol əfsanəsi Lionel Messi və dünya ulduzları Luis Suares, Serxio Buskets və Xordi Albanın Bakı Kristal Zalında fanatlarına unudulmaz anlar yaşatdığı oxucuların diqqətinə çatdırılıb.

Bildirilib ki, cəmi birgünlük səfər çərçivəsində onlar Fəxri xiyabana gələrək Heydər Əliyevin məzarını ziyarət edib, Ulu Öndərin xatirəsini anıblar.

Ermənistanın “Aysor.am” nəşri Prezident köməkçisi Hikmət Hacıyevin açıqlamasına istinad edib.

Xəbərdə qeyd olunub ki, Ermənistan və Azərbaycan arasında qarşılıqlı sülh danışıqları gedirsə, burada üçüncü ölkəyə ehtiyac yoxdur.

Bildirilib ki, bu barədə Azərbaycan Respublikası Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev deyib.

İranın “İRNA” xəbər portalı bildirib ki, Azərbaycanın İrandakı səfirliyinin konsulluq şöbəsi fəaliyyətini bərpa edib.

Mənbə Azərbaycan Xarici İşlər Nazirliyinin məlumatına istinad edib.

Vurğulanıb ki, dekabrın 15-dən etibarən Azərbaycan Respublikasının İran İslam Respublikasındakı səfirliyinin konsulluq şöbəsi öz fəaliyyətini bərpa edib.