XİN rəhbəri müsəlman ölkələrin səfirləri üçün təşkil olunmuş iftarda iştirak etdi

“ATƏT-in artıq aktual olmayan Minsk qrupunun ləğvi vacibdir”.

Bunu xarici işlər naziri Ceyhun Bayramov Azərbaycanda akkreditə olunan müsəlman ölkələrinin səfirləri üçün təşkil edilmiş iftar tədbirində deyib.

Postmünaqişə dövründə baş verən proseslər barədə danışan nazir Azərbaycan və Ermənistan arasında sülh və dövlətlərarası münasibətlərin qurulması haqqında ikitərəfli saziş layihəsinin mətni üzrə danışıqların yekunlaşdığını bildirib.

Bununla yanaşı, sazişin imzalanması üçün Ermənistan konstitusiyasında ölkəmizə qarşı ərazi iddialarının aradan qaldırılması ilə bağlı müvafiq düzəlişin edilməsi tələbi bir daha vurğulanıb. Bu xüsusda, ATƏT-in artıq aktual olmayan Minsk qrupu və digər aidiyyəti strukturlarının ləğvinin də vacibliyi diqqətə çatdırılıb.

Nazir həmçinin Müzəffər Ali Baş Komandanın rəhbərlik etdiyi Şanlı Ordumuz tərəfindən torpaqlarımızın işğaldan azad olunması, keçmiş münaqişəyə son qoyulmasından sonra bölgəmizdəki dinamik inkişafdan ətraflı bəhs edib, ərazi bütövlüyümüz və suverenliyimiz uğrunda canlarından keçən şəhidlərimizin əziz xatirəsini yad edib.