XİN təcili bəyanat yaydı

Xarici İşlər Nazirliyindən Müdafiə Nazirliyinin son bəyanatlarına dəstək gəlib.

Qeyd olunub ki, son günlər Ermənistandan Rusiya sülhməramlı kontingentinin müvəqqəti yerləşdiyi Azərbaycan ərazisindəki Ermənistan silahlı qüvvələri üçün canlı qüvvə, silah-sursat, mina, eləcə də digər hərbi təyinatlı vasitələrin daşınmasının intensivləşməsi, həmçinin son bir neçə gündə Xankəndi-Xəlfəli-Turşsu və Xankəndi-Kosalar-Mirzələr-Turşsu yollarında ermənilər tərəfindən qeyri-qanuni yol tikinti işlərinin aparılması qeydə alınıb.

Azərbaycan tərəfinin çoxsaylı müraciətlərinə və aparılmış müzakirələrə baxmayaraq, bu qanunsuzluqların qarşısının alınması üçün bu günədək heç bir zəruri tədbir görülməyib.

Bununla yanaşı, 5 mart tarixində Xankəndi-Xəlfəli-Turşsu yolunda, habelə 20 mart tarixində Zəngilan rayonu istiqamətində Ermənistanın törətdiyi təxribatlar nəticəsində Azərbaycan hərbçilərinin şəhid olması və yaralanması Ermənistanın vəziyyəti qəsdən gərginləşdirmək niyyətini nümayiş etdirib.

XİN-in açıqlamasında o da qeyd olunub ki, Ermənistan tərəfinin son təxribatları Azərbaycanın suveren ərazilərində qeyri-qanuni fəaliyyətlərin qarşısının alınması məqsədilə Laçın yolunun son nöqtəsində – Azərbaycanla Ermənistan arasında sərhəd-keçid və nəzarət məntəqəsinin yaradılmasının zəruri olduğunu göstərir.