Zakir Həsənovun İtaliyanın müdafiə naziri ilə görüşündən görüntülər

Müdafiə naziri Zakir Həsənovla Azərbaycanda rəsmi səfərdə olan İtaliyanın müdafiə naziri Quido Krosettonun rəhbərlik etdiyi nümayəndə heyəti arasında geniş tərkibdə görüş keçirilib.

Bu barədə Müdafiə Nazirliyindən məlumat verilib.

Müdafiə Nazirliyində keçirilən rəsmi qarşılanma mərasimində nazirlər fəxri qarovulun önündən keçiblər.

Nümunəvi hərbi orkestrin müşayiəti ilə hər iki ölkənin dövlət himnləri səsləndirilib və protokola uyğun olaraq “Şərəf kitabı” imzalanıb.

Zakir Həsənov Azərbaycan və İtaliya arasında münasibətlərin strateji tərəfdaşlığa söykəndiyini xüsusi vurğulayıb.

Ölkəmizin əlamətdar günü – Silahlı Qüvvələr Günü və Azərbaycan Ordusunun yaradılmasının 106-cı ildönümündə yanımızda olduğuna görə italiyalı həmkarına təşəkkürünü bildirib.

Zakir Həsənov italiyalı həmkarını sentyabrda Bakıda keçiriləcək “ADEX” 5-ci Azərbaycan Beynəlxalq Müdafiə Sərgisinə dəvət edib.

Azərbaycana hər səfərindən məmnun qaldığını və səmimi münasibət gördüyünü qeyd edən italiyalı nazir göstərilən qonaqpərvərliyə görə təşəkkür edərək ölkələrimiz arasında hərbi əməkdaşlığın inkişafında qarşılıqlı səfərlərin vacibliyini vurğulayıb.

Görüşdə Azərbaycan və İtaliya arasında hərbi əməkdaşlığın hazırkı vəziyyətindən məmnunluq ifadə edilib, həmçinin hərbi, hərbi-texniki, hərbi-təhsil və digər sahələrdə əməkdaşlığın inkişaf perspektivləri, habelə qarşılıqlı maraq doğuran bir sıra məsələlərə dair ətraflı fikir mübadiləsi aparılıb.