Zaxarova bu dəfə ona od püskürdü | Biz bunu dəfələrlə qeyd etmişik!

“Ermənistanın hakimiyyətyönümlü “Telegram” kanallarını oxusanız, xəstəlik tuta bilərsiniz. Ona görə də onlara baxmasanız, yaxşıdır”.

Bu barədə Rusiya Xarici İşlər Nazirliyinin rəsmi nümayəndəsi Mariya Zaxarova dekabrın 18-i keçirdiyi brifinqdə erməni jurnalistin Ermənistanın “Telegram” kanallarında yayılan məlumata görə, Azərbaycanın guya üçüncü ölkə vasitəsilə Hindistandan silah almaq təklifi göndərdiyi barədə sualını cavablandırarkən deyib.

“Azərbaycan və Ermənistanın Hindistanla hərbi-texniki əməkdaşlığı bu dövlətlərin işidir”, – deyən M.Zaxarova həmçinin qeyd edib ki, Moskva Bakı ilə İrəvan arasında humanitar məsələlər üzrə dialoqa yardım etməyə hazırdır.

XİN rəsmisi bildirib ki, ən yüksək səviyyədə üçtərəfli sazişlərin elementlərindən biri humanitar blokun müzakirəsidir.

“Buraya qaçqınların hüquqlarına hörmət, mədəni və dini irs abidələrinin qorunması, itkin düşmüş şəxslərin axtarışı və hərbi əsirlərin mübadiləsi kimi məsələlər daxildir. Biz Bakı ilə İrəvan arasında həm rəsmi, həm də ictimai xətt üzrə humanitar məsələlərin bütün spektri ilə bağlı dialoqun bərpasının vacibliyini dəfələrlə qeyd etmişik”, – deyə M.Zaxarova vurğulayıb.