Zaxarova bu dəfə onlara od püskürdü | Özümüz onun fəaliyyətindən narazı olmuşuq

“Həm rəsmi Bakı, həm də rəsmi İrəvan bütün səviyyələrdə Rusiyanın vasitəçi rolunu yüksək qiymətləndirib”.

Bunu Rusiya Xarici İşlər Nazirliyinin rəsmi nümayəndəsi Mariya Zaxarova noyabrın 13-də keçirdiyi brifinqdə deyib.

Onun sözlərinə görə, Azərbaycan və Ermənistan keçmiş münaqişənin nizamlanmasının müxtəlif mərhələlərində Moskvanın vasitəçi rolunu yüksək qiymətləndirib.

“O ki qaldı Minsk qrupuna, biz özümüz onun fəaliyyətindən narazı olmuşuq. Biz Minsk qrupunu daha çox tənqid etmişik, xüsusilə də qərblilərin Minsk qrupunun işini bloklamağa başlayandan sonra. Biz bu mövqeyimizi açıq bəyan etmişik.

Minsk qrupunda olan müsbət məqamlar Rusiyanın işləmələrinə əsaslanıb. Bunlar o cümlədən Rusiya, Azərbaycan və Ermənistan arasında olan üçtərəfli razılaşmalarda da öz əksini tapıb. Hansı ki, bu da Ermənistan və Azərbaycan tərəfindən yüksək qiymətləndirilib.

2022-ci ilin fevralında Minsk qrupu Qərb ölkələrinin əli ilə dəfn olunub. Aydın idi ki, onlar vəziyyətin nizamlanmasında deyil, başqa şey etmək niyyətində olublar – siyasiləşdirmək, öz maraqlarını güdmək. Bunun bizə heç bir aidiyyəti yoxdur. Minsk qrupunda müsbət nəsə olanda biz müsbət haqqında danışmışıq. Harada neqativ üstünlük təşkil edib, demişik ki, Minsk qrupu daha işləmir, onun fəaliyyəti bloklanır, süni yolla bloklanır. Burada müxtəlif tarixi məqamlar, fərqli vəziyyətlər və kontekstlər var”, – deyə M.Zaxarova vurğulayıb.