Zaxarova Ermənistanla bağlı nələri etiraf etdi?

“Cənubi Qafqazda kommunikasiyaların açılması üzrə üçtərəfli işçi qrupun fəaliyyəti Ermənistana görə dondurulub”.

Bu sözləri Rusiya Xarici İşlər Nazirliyinin rəsmi nümayəndəsi Mariya Zaxarova brifinq zamanı bildirib.

“Təəssüf ki, hazırda işçi qrupunun işi dayandırılıb. Mən bunu səsləndirməyə məcburam, çünki bu faktdır. Həqiqətən də vəziyyət Ermənistan tərəfinin mövqeyinə görə belədir. Biz tam qarşılıqlı fəaliyyətin bərpasına hazır olduğumuzu bir daha təsdiqləyirik”, – deyə Moskva rəsmisi bəyan edib.

Zaxarova vurğulayıb ki, işçi qrup Ermənistan və Azərbaycan arasında nəqliyyat marşrutlarının bərpasının həm hüquqi əsaslarının, o cümlədən də texniki parametrlərinin razılaşdırılması üzrə ciddi iş görüb.

“Məhz üçtərəfli işçi qrupunda kommunikasiyaların açılmasının əsas prinsipi barədə razılıq əldə olunub. Bu, dövlətlərin öz ərazisindən keçən marşrutlar üzərində suverenlik və yurisdiksiyasının qorunmasından ibarətdir. Bu şərt həm Bakı, həm də İrəvan tərəfindən rəğbətlə qarşılanıb”, – deyə diplomat qeyd edib.