Zaxarova ona “Xarı Bülbül” nişanının verilməsindən danışdı

“Simvolik hədiyyəni siyasiləşdirmək lazım deyil”.

Bunu Rusiya Xarici İşlər Nazirliyinin rəsmi nümayəndəsi Mariya Zaxarova ona “Xarı Bülbül” döş nişanının hədiyyə edilməsinə münasibət bildirərkən deyib.

Qeyd edib ki, bu hədiyyə ətrafında yaradılan söz-söhbət növbəti şişirdilmiş hadisədir:

“Bu festivala gəlməyənlər, orada olmayanlar yəqin ki, bilmirlər ki, bütün festival iştirakçıları özləri ilə hədiyyələr gətiriblər. Fələstinlilər, argentinalılar, çinlilər və digərləri millətlərinə, ölkələrinə aid simvolların əks olunduğu hədiyyələr, suvenirlər gətiriblər. Bu o demək deyil ki, bunları siyasiləşdirmək lazımdır.

İnsanlar özləri üçün vacib olan simvolik hədiyyələri bağışlamaqla həmin hədiyyələr vasitəsilə öz hekayələrini danışırlar. Təxribatlar həmişə olub və olacaq. Onlara fikir vermək lazım deyil. Ən əsası hər şeydə pozitivlik axtarmaq lazımdır”.

Xatırladaq ki, bir müddət öncə azərbaycanlı qadın Soçidə keçirilən Ümumdünya Gənclər Festivalı çərçivəsində Rusiya Xarici İşlər Nazirliyinin rəsmi nümayəndəsi Mariya Zaxarovaya 44 günlük müharibədə qələbənin simvolu olan “Xarı Bülbül” döş nişanını hədiyyə edib.