Zaxarova onlara od püskürdü | Sizdən fərqli olaraq, Azərbaycanın media nümayəndələri...

Rusiya Xarici İşlər Nazirliyinin rəsmi nümayəndəsi Mariya Zaxarova erməni jurnalistlərin ünvanına kəskin fikirlər səsləndirib.

Mətbuat katibinin keçirdiyi ənənəvi brifinqdə ona erməni jurnalist suallar ünvanlayıb. Jurnalistin təxribat xarakterli sualları Rusiya-Azərbaycan münasibətlərində müşahidə olunan gərginlik, səfirlərin qarşılıqlı olaraq xarici işlər nazirliklərinə çağırılması guya Azərbaycanda anti-Rusiya siyasətinin aparılması ilə bağlı olub. Absurd sualları eşidən Rusiya Xarici İşlər Nazirliyinin sözçüsü jurnalisti sərt ifadələrlə susdurub.

“Yəni siz başa düşmürsünüz ki, Ermənistan KİV nümayəndəsinin dilindən Rusiyanın Azərbaycandakı səfirinin və ya Azərbaycanın Rusiyadakı səfirinin Nazirliyə çağırılması, Rusiya-Azərbaycan ikitərəfli gündəliyə aid məsələnin səslənməsi absurd görünür? Düşünürdüm ki, siz məndən Davosda səslənən “erməni soyqırımı” bəyanatı haqqında soruşacaqsınız. Ermənistan mediasının nümayəndəsi bizim Azərbaycanla ikitərəfli münasibətlərimizi necə qurmağımız, iki ölkənin mövcud problemləri necə həll etməsi, münasibətləri necə inkişaf etdirməyimiz, münasibətlərdəki çətinliklərin qarşısını necə almağımıza dair sual verə bilməz. Bu, absurddur.

Niyə Ermənistan KİV nümayəndələri istisnasız olaraq Rusiya nümayəndəsinə Rusiya-Ermənistan münasibətləri barədə deyil, başqa ölkə ilə ikitərəfli münasibətlər haqqında suallar verir? Diqqətinizə çatdırım ki, Azərbaycan media nümayəndələri belə etmir. Əmin olmaq üçün bizim ötən brifinqlərimizə baxa bilərsiniz. Azərbaycan KİV-lərinin sualları ikitərəfli gündəliyimizlə bağlı olub. Əlbəttə ki, həm də Bakı-İrəvan münasibətlərinin normallaşması prosesinə aid suallar olub”, – deyə M.Zaxarova bildirib.

Onu da qeyd edək ki, yaranan gərginliyə baxmayaraq, M.Zaxarova məlum sualla bağlı bir neçə gün əvvəl Rusiya XİN-in yaydığı məlumatı təkrarlayıb.