Zaxarova rəsmi Parisi kəskin tənqid etdi

Fransa Ermənistan-Azərbaycan münasibətlərinin normallaşmasında öz vasitəçilik rolunu gözdən salıb.

Bunu Rusiya Xarici İşlər Nazirliyinin rəsmisi Mariya Zaxarova brifinq zamanı deyib. O, Emmanuel Makronun Qarabağ məsələsi ilə bağlı mövqeyini “pafos” adlandırıb və Parisdə konkret nəticənin olmadığını deyib.

M.Zaxarovanın sözlərinə görə, Moskvada uzun müddətdir ki, Fransanın Qarabağ məsələsində müsbət töhfə verə biləcəyi ilə bağlı heç bir illüziya yoxdur.

“Ermənistana şübhəli avropalı müşahidəçilər missiyasının göndərilməsi və ATƏT-in Minsk qrupunun dağılmasında Parisin də rolu olub. Bu nümayişkaranə addımlar tərəflərə kömək etmək deyil, Rusiyanı regiondan sıxışdırıb çıxarmaq və öz hədəflərinə çatmaq məqsədi daşıyır", – deyə M.Zaxarova əlavə edib.