Zaxarovadan Laçın yolu ilə bağlı açıqlama

“Biz rəsmi İrəvanın Laçın yolu ətrafında vəziyyətin qarşılıqlı məqbul həll yollarının axtarışına töhfə verməsini prinsipial olaraq vacib hesab edirik”.

Bunu Rusiya Xarici İşlər Nazirliyinin rəsmi nümayəndəsi Mariya Zaxarova aprelin 27-də keçirdiyi həftəlik brifinqdə “News.ru” portalının sualını cavablandırarkən deyib.

O qeyd edib ki, hazırda rəsmi Bakı ilə İrəvan arasında münasibətlərin 2020-ci il 10 noyabr tarixli üçtərəfli bəyanata uyğun olaraq normallaşdırılması üçün lazımi səylər davam etdirilir.

Fransanın Avropa və xarici işlər naziri Katrin Kolonnanın Cənubi Qafqaz ölkələrinə başlayan səfərini də şərh edən M.Zaxarova qeyd edib ki, Qərb dövlətlərinin Azərbaycan-Ermənistan münasibətlərinin normallaşması prosesində iştirakı mövcud vəziyyətin daha da gərginləşməsinə gətirib çıxarır.

Rusiya XİN nümayəndəsi həmçinin əlavə edib ki, Rusiya, Azərbaycan və Ermənistan xarici işlər nazirləri arasında görüş üçün razılıq əldə olunub. Onun sözlərinə görə, görüşün dəqiq tarixi daha sonra açıqlanacaq.