Zaxarovadan Mirzoyana qarşı sərt reaksiya

“Ermənistanın xarici işlər naziri Ararat Mirzoyanın axırıncı mətbuat konfransının tonu və məzmunu təəssüf doğurmaya bilməz”.

Bunu Rusiya Xarici İşlər Nazirliyinin rəsmi nümayəndəsi Mariya Zaxarova yanvarın 26-da keçirdiyi brifinqdə bildirib.

O, Mirzoyanın dediklərini yalan adlandırıb:

“Obyektiv nəticə çıxarmaq, xüsusilə də öz səhvlərindən dərs almaq əvəzinə, bütün məsuliyyəti Rusiyanın üzərinə yıxmağa cəhd edilib. Bunun heç bir əsası yoxdur. Çünki bu, Rusiyanın səhvi deyil. Bu, təəssüflər olsun ki, rəsmi İrəvanın səhvidir. 2022-ci ilin sentyabrında Ermənistanın Azərbaycanla sərhəd rayonlarında vəziyyətin gərginləşməsi ilə bağlı Ermənistanın Rusiya və KTMT-yə müraciət etməsi ilə bağlı dedikləri həqiqətə uyğun deyil”.

M.Zaxarova A.Mirzoyanın üçtərəfli 10 noyabr bəyanatının fəaliyyətdə olmaması ilə bağlı səsləndirdiyi açıqlamada da ziddiyyətlər gördüyünü deyib. Onun sözlərinə görə, Ermənistan bir tərəfdən vurğulayır ki, bu bəyanat fəaliyyətdə deyil, digər tərəfdən isə ölkəsinin sözügedən sənədə uyğun olaraq üzərinə götürdüyü öhdəlikləri yerinə yetirməyə sadiq olduğunu bildirir.

M.Zaxarova sülh müqaviləsi problematikası ilə bağlı ötən ilin sentyabrından başlayaraq Moskvada məsləhətləşmələr üçün Ermənistan xarici işlər naziri Ararat Mirzoyana dəfələrlə dəvət göndərildiyini də xatırladıb.