Zelenskidən Azərbaycan şirkətinin vurulması ilə bağlı mühüm açıqlama

Ukrayna Prezidenti Volodimir Zelenski Odessa şəhərində Azərbaycana məxsus enerji obyektinə edilən hücumun Rusiya tərəfindən məqsədli şəkildə həyata keçirildiyini deyib.

Bu barədə o özünün sosial media hesabında yazıb.

“Rusiya tərəfindən Odessada Azərbaycan şirkətinə məxsus enerji obyektinə qəsdən hücum olub. Bu bizim münasibətlərimizə və enerji müstəqilliyimizə hücumdur”, – deyə V.Zelenski qeyd edib.

Ukrayna lideri Rusiyanın məqsədyönlü olaraq mülki şəxsləri və infrastrukturu hədəf aldığını bildirib. V.Zelenski müharibənin dayanmalı olduğunu və bunun üçün Rusiyanın addım atmalı olduğunu vurğulayıb.

Xatırladaq ki, Rusiya Silahlı Qüvvələri Odessada Azərbaycan şirkətinə aid enerji obyektini vurub. Xarici medianın məlumatında Rusiyanın “Şahed” PUA-ları vasitəsilə Odessada yerləşən terminala hücum etdiyi bildirilib.

Qeyd edək ki, Rusiya avqustun 8-də də Odessa vilayətində Azərbaycan şirkətinə aid neft bazasına hücum etmişdi.