Durov “Telegram”ın Rusiyada bağlanmasına münasibət bildirdi

“Telegram”ın qurucusu və sahibi Pavel Durov Rusiyada “Telegram”ın məhdudlaşdırılmasına münasibət bildirib.

Sahibkar Rusiyanın vətəndaşlarını nəzarət və siyasi senzura üçün nəzərdə tutulmuş, dövlət tərəfindən idarə olunan tətbiqə keçməyə məcbur etmək üçün “Telegram”a girişi məhdudlaşdırdığını söyləyib.

“Səkkiz il əvvəl İran da eyni strategiyanı sınadı və uğursuz oldu. İnsanları dövlət tərəfindən idarə olunan alternativə keçməyə məcbur etmək üçün uydurma bəhanələrlə “Telegram”ı qadağan etdi. Qadağaya baxmayaraq, əksər iranlılar hələ də senzuradan yayınaraq “Telegram”dan istifadə edir və onu nəzarətə məruz qalan tətbiqlərdən üstün tuturlar. Vətəndaşların azadlığını məhdudlaşdırmaq heç vaxt düzgün həll yolu deyil. “Telegram” hər hansı bir təzyiqə baxmayaraq, söz azadlığı və şəxsi həyatın toxunulmazlığını müdafiə edir”, – deyə Durov bildirib.

Artıq rusiyalı istifadəçilər ikinci gündür “Telegram”ın işindəki nasazlıqlardan şikayətlənirlər. Belə ki, istifadəçilər mediafaylların yüklənməsi və mesajların göndərilməsində problemlərin olduğunu bildirirlər.

Qeyd edək ki, Roskomnadzor ölkədə “Telegram”ın məhdudlaşdırılmasına başlayıb. Qurum bunu messencerin Rusiya qanunlarına əməl etmədiyi ilə izah edib.