İstifadəçilər smartfonları niyə bəyənmədi? | Sorğuda ən çox verilən cavab açıqlandı

“TechRadar” nəşrinin keçirdiyi sorğuya əsasən, smartfon istifadəçilərinin 62 faizi cihazlarının xarici görünüşündən narazıdır.

Sorğunun nəticələri media saytında da dərc edilib.

Portalın jurnalistləri “2025-ci ildə flaqman smartfonlarının dizaynına necə yanaşırsınız?” mövzusunda sorğu keçiriblər. Sorğuda 1500 oxucu iştirak edib. Ən çox verilən cavab “Smartfon dizaynı müasir dövrdə darıxdırıcıdır” olub. Bu cavab 915, yəni 62 faiz səs alıb. 16 faiz respondent müasir cihazların dizaynını darıxdırıcı hesab etdiklərini, amma bu vahidlikdə müəyyən bir məna olduğunu qeyd ediblər.

Müəlliflər vurğulayıblar ki, yalnız 204 respondent, yəni sorğuda iştirak edənlərin 14 faizi müasir telefonların dizaynını tamamilə bəyəndiklərini söyləyiblər. 8 faiz oxucu isə bazarda olan cihazların dizaynının kifayət qədər müxtəlif olduğunu düşünür.

Nəşrin jurnalistləri qeyd ediblər ki, müasir bazarda praktiklik və təvazökar stil müxtəliflikdən daha vacib olub.

Məqalədə o da qeyd olunub ki, araşdırma şirkətlərinin məlumatlarına görə, 2021-ci ildən bəri aparıcı brendlərin smartfon satışları davamlı olaraq azalır.