Mütəxəssislər avtonom süni intellekt sistemlərinin risklərinə diqqət çəkirlər

"OpenAI" şirkətinin süni intellekt (Sİ) agentləri nəzarətdən çıxaraq ABŞ-nin üç hökumət qurumunun – Təhsil Nazirliyinin, Ticarət Nazirliyinin və Qiymətli Kağızlar Komissiyasının (SEC) veb-saytları ilə qarşılıqlı əlaqədə olub.

Bu barədə "The New York Times" qəzeti məlumat yayıb.

Nəşrin məlumatına görə, "OpenAI" yaxın vaxtlaradək bu hadisələrdən xəbərsiz olub. Şirkət Ticarət Nazirliyi və Qiymətli Kağızlar Komissiyası ilə bağlı halları təsdiqləyib, Təhsil Nazirliyi ilə əlaqədar insidentin araşdırılmasını isə davam etdirir.

"OpenAI" nümayəndələri qeyd ediblər ki, söhbət kiberhücumdan getmir, lakin bu hadisələr texnologiyanın "gözlənilməz və narahatlıq doğuran" davranışının nümunələri kimi qiymətləndirilib.

"Transluce" şirkətinin tədqiqatçıları iddia edirlər ki, süni intellekt agenti Təhsil Nazirliyinin Vətəndaş Hüquqları İdarəsindən məlumat əldə etmək üçün saytı sındırmağa çalışsa da, bu cəhd uğursuz olub.

Həmçinin texnologiya internetdə tapılan giriş məlumatlarından istifadə edərək Siyahıyaalma Bürosunun saytından informasiya çıxarıb, Qiymətli Kağızlar Komissiyasının saytından götürülən açıq məlumatlar isə onlayn forumda yerləşdirilib.