Süni intellektdən istifadə aldığımız məlumatların müxtəlifliyinə necə təsir edə bilər?

Süni intellekt çatbotlarından gündəlik məlumat mənbəyi kimi istifadənin artması insanların əldə etdiyi informasiyanın müxtəlifliyini azalda bilər.

Kopenhagen Universitetinin tədqiqatçıları 155 mövzu üzrə 27 böyük dil modelini sınaqdan keçirib və nəticələri “Google” axtarışı ilə müqayisə ediblər.

Araşdırmaya görə, bütün test edilən modellər ənənəvi axtarış sistemi ilə müqayisədə daha az müxtəlif məlumat təqdim edib. Hətta ən müxtəlif cavabları verən GPT-5 modelində də bu göstəricinin “Google” axtarışından 18,7 faiz aşağı olduğu müəyyənləşdirilib.

Tədqiqatçılar bildirirlər ki, insanların eyni məlumatlarla daha çox qarşılaşması zamanla bilik dairəsinin daralmasına səbəb ola bilər. Süni intellekt tərəfindən yaradılan mətnlərin gələcək modellərin təlimində geniş istifadəsi isə bu prosesi sürətləndirə bilər.

Mütəxəssislər bu ehtimalı “bilik çöküşü” adlandırırlar. Bununla belə, hazırda belə bir prosesin artıq baş verdiyini söyləməyin mümkün olmadığı qeyd olunur.

Tədqiqatçılar istifadəçilərə xüsusilə mühüm və mürəkkəb məsələlərdə, çatbot cavabları ilə kifayətlənməməyi və müxtəlif informasiya mənbələrinə müraciət etməyi tövsiyə edirlər.