2025-2026-cı tədris ili ilə bağlı məlumatlar

Sentyabrın 15-i ölkənin bütün ümumtəhsil, orta ixtisas və ali təhsil müəssisələrində yeni dərs ili başlayır.

Bakı Şəhəri üzrə Təhsil İdarəsinin məlumatına görə, yeni tədris ilində idarənin tabeliyində fəaliyyət göstərən ümumi təhsil müəssisələrində, ümumilikdə, 505 766 şagirdin təhsil alacağı gözlənilir.

Təhsil İdarəsinin tabeliyindəki ümumi təhsil məktəblərinin I sinfində 39 622, IX sinfində 47 438, XI sinfində 35 134, XII sinfində 124 şagird təhsil alacaq.

Paytaxtdakı ümumi təhsil müəssisələrinin məktəbəhazırlıq qruplarına 21 491 beşyaşlının cəlb olunması nəzərdə tutulur. Təhsil İdarəsinin tabeliyində fəaliyyət göstərən məktəbəqədər təhsil müəssisələrinə isə 35 028 uşaq cəlb olunub.

Qurumun tabeliyində fəaliyyət göstərən ümumi təhsil müəssisələrində 28 127 müəllim, məktəbəqədər təhsil müəssisələrində isə 4149 tərbiyəçi-müəllim çalışır.

Qeyd edək ki, Bakı Şəhəri üzrə Təhsil İdarəsinin tabeliyində 673 təhsil müəssisəsi, 9 məktəbdənkənar müəssisə fəaliyyət göstərir. Ümumilikdə isə 2025-2026-cı tədris ilində respublika üzrə 1,6 milyon şagirdin təhsil alacağı gözlənilir. 130 mindən çox şagird 1-ci sinfə gedəcək.